„Við höfðum trú á að geta veitt Val alvöruleik og við gerðum það. Ekki er langt síðan að við vorum í hörkuleik við Val í deildinni og þess vegna höfðum við fulla trú á okkar getu þótt margar spár hafi bent til annars,“ sagði Sigurgeir Jónsson, Sissi, þjálfari kvennaliðs Stjörnunnar í samtali við handbolta.is eftir að lið hans tapaði fyrir Val með þriggja marka mun, 25:22, í úrslitaleik Powerade-bikarsins í handknattleik kvenna í Laugardalshöll í dag.
„Margt af því sem við lögðum upp með gekk vel, annað ekki. Sóknarleikurinn var ekki svo slæmur hjá okkur en því miður þá klúðruðum við alltof mörgum opnum færum sem við höfðum lagt vinnu í að skapa. Það er dýrt í úrslitaleik. Á sama tíma skoraði Valur eitt og eitt mark þar sem boltinn lak inn. Til viðbótar þá fóru tvö vítaköst forgörðum hjá okkur. Það er einnig kostnaðarsamt í jöfnum úrslitaleik,“ sagði Sissi. „Þetta gekk bara því miður ekki hjá okkur í dag.“
„Ég er hriklega stoltur af stelpunum sem sýndu ótrúlega flottan baráttuleik. Við mættum flott til leiks og það var frábært hvernig okkur tókst að halda pressu allt til leiksloka,“ sagði Sigurgeir Jónsson þjálfari Stjörnunnar við handbolta.is í dag.
Tengt efni:
Valur bikarmeistari í níunda sinn – Stjarnan veitti harða mótspyrnu
