Þórey Anna Ásgeirsdóttir, handknattleikskona hjá nýkrýndum Íslandsmeisturum Vals og landsliðskona, var valin besti leikmaður úrslitakeppni Olísdeildar kvenna sem lauk í gær í Vestmannaeyjum með þriðja sigri Þóreyjar Önnu og samherja í Val.
Þórey Anna, sem leikur bæði í hægra horni og í hægri skyttu, var afar öflug með Valsliðinu í úrslitakeppninni. M.a. skoraði hún 23 mörk í leikjunum þremur við ÍBV í úrslitarimmunni, þar af níu í síðasta leiknum í gær. Alls skoraði Þórey Anna 50 mörk í leikjunum sjö, gegn Stjörnunni í undanúrslitum og ÍBV í úrslitunum sjálfum. Þóreyju Önnu brást vart bogalistin í vítaköstum á keppnistímabilinu.
Endurheimti landsliðssæti
Valið kemur ekki í opna skjöldu þar sem Þórey Anna hefur ekki aðeins leikið vel í úrslitakeppninni heldur allt tímabilið sótt jafnt og þétt í sig veðrið sem varð m.a. til þess að hún endurheimti sæti í íslenska landsliðinu í leikjum þess í mars og í apríl.
Besti leikmaður úrslitakeppni Olísdeildar kvenna ⭐️
— HBStatz (@HBSstatz) May 20, 2023
Tapar varla boltanum 👀#olisdeildin #handbolti pic.twitter.com/fH0awjSHgB
