Þórey Anna Ásgeirsdóttir setti nýtt markamet á heimsmeistaramóti er hún skoraði 10 mörk í leiknum gegn Grænlendingum, 37:14, í Nord Arena í Frederikshavn í sínum fertugasta landsleik. Þórey Anna leysti nöfnu sína Þóreyju Rósu Stefánsdóttur, af í hægri horninu í seinni hálfleik. Þórey Rósa hafði skorað 4 mörk – tvö úr horni og tvö eftir hraðaupphlaup.
Markamet Þóreyjar Önnu er glæsilegt, þar sem hún skoraði 10 mörk úr 10 skottilraunum; 100% nýting. 6 mörk úr horni, tvö eftir hraðaupphlaup og tvö úr vítaköstum. Þórey Anna hefur skorað 12 HM-mörk, en hún skoraði tvö mörk gegn Frökkum á dögunum.
Þórey bætti HM-met Karenar Knútsdóttur, sem hafði áður skorað flest mörk í HM-leik; 9 gegn Þýskalandi í Brasilíu 2011, 26:20. Dagný Skúladóttir kemur næst á blaði með 8 mörkum gegn Kína, 23:16 og Stella Sigurðardóttir skoraði 7 mörk gegn Angóla á HM 2011, 24:28.
Sandra Erlingsdóttir skoraði 7 mörk í leiknum gegn Frökkum á dögunum, 22:31.
9 mörk úr hornum og 8 úr hraðaupphlaupum
Frábær byrjun í forsetabikarnum – stórsigur á Grænlendingum
