„Þetta er ótrúlega sárt en ég er ofboðslega stolt af liðinu. Við gáfum allt í þetta, börðumst allan tímann. Við getum verið stoltar því að hafa lagt allt í leikinn,“ sagði Inga Dís Jóhannsdóttir leikmaður U20 ára landsliðs kvenna í samtali við handbolta.is í Jane Sandanski Arena íþróttahöllinni í Skopje í kvöld eftir að íslenska liðið tapaði fyrir Evrópumeisturum Ungverjalands, 34:31, eftir framlengdan leik í átta liða úrslitum. Íslenska liðið jafnaði metin, 29:29, rétt fyrir lok venjulegs leiktíma.
Íslenska liðið var sjö mörkum undir í hálfleik, 19:12, en sýndi frábæran leik í síðari hálfleik við að vinna upp forskot Ungverja sem skoruðu aðeins 10 mörk í síðari hálfleik. Inga Dís lék stórt hlutverki í framliggjandi 5/1 vörn sem sló Ungverja út af laginu.
„Við tókum bara eina vörn í einu vitandi það að allur síðari hálfleikur var eftir. Við hefðum svo sannarlega viljað vinna á lokakafla venjulegs leiktíma en jafntefli við Ungverja er bara helv… vel gert,“ sagði Inga Dís.
Tinna Sigurrós Traustadóttir og Elísa Elíasdóttir meiddust. Tinna meiddist strax í fyrri hálfleik en Elísa fékk höfuðhögg á upphafsmínútum síðari hálfleiks og var flutt undir læknishendur.
„Liðsheildin er frábær hjá okkur og það kom bara maður í manns stað,“ sagði Inga Dís Jóhannsdóttir leikmaður U20 ára landsliðsins í samtali við handbolta.is.
Lengra myndskeiðsviðtal er við Ingu Dís í efst í þessari frétt.
HMU20: Dagskrá og úrslit síðustu leikdagana
