Viktor Gísli Hallgrímsson og Óðinn Þór Ríkharðsson fögnuðu sigrum með liðum sínum, Nantes og Kadetten Schaffhausen, þegar 16-liða úrslit Evrópudeildarinnar í handknattleik hófst í kvöld. Nantes lagði Hannover-Burgdorf, 38:32, í Þýskalandi. Heiðmar Felixson er aðstoðarþjálfari Hannover-Burgdorf.
Óðinn og félagar unnu serbnesku meistarana Vojvodina frá Novi Sad, 27:24, í Schaffhausen í Sviss. Óðinn Þór var markahæstur með átta mörk í níu skotum. Kadetten er í þriðja riðli með Flensburg og Bjerringbro/Silkebog auk Vojvodina.
Varði 15 skot
Viktor Gísli var í marki Nantes allan leikinn í Hannover í kvöld og stóð sig afar vel. Hann varði 15 skot, 32%. Nantes var marki yfir í hálfleik, 18:17. Vel útfærður sóknarleikur og fjöldi hraðaupphlaupa lagði grunninn að sigri Nantes sem leikur í 1. riðli.
Hér fyrir neðan er ein af vörslum Viktors Gísla í leiknum í kvöld.
𝗛𝗮𝗹𝗹𝗴𝗿𝗶𝗺𝘀𝘀𝗼𝗻✨saving it on the line 😵 #ehfel #elm #allin pic.twitter.com/NiM5cfKVgM
— EHF European League (@ehfel_official) February 13, 2024
Fleiri leikir standa yfir í 16-liða úrslitum en þeim verður öllum gerð skil ásamt stöðunni í riðlunum á handbolti.is síðar í kvöld.
Evrópudeild karla – 16-liða úrslit – leikir og staðan
Fjórir fjögurra liða riðlar
Sextán liða úrslit Evrópudeildar karla eru leikin í fjórum fjögurra liða riðlum. Liðin taka með sér úrslit leikja úr riðlakeppni 32-liða úrslita. T.d. þá voru Hannover-Burgdorf og Górnik Zabrze saman í riðli í 32 liða úrslitum. Þau mætast ekki aftur þótt þau séu saman í riðli. Sömu sögu er að segja af Nantes og Rhein-Neckar Löwen sem einnig eru í riðli eitt.
Beint í átta liða úrslit
Leikið verður heima og að heiman, alls fjórar umferðir. Eftir það fara sigurlið hvers riðils beint áfram í átta liða úrslit. Liðin sem hafna í öðru og þriðja sæti mætast heima og heiman. Sem dæmi má nefna er að liðið sem hafnar í öðru sæti í riðli eitt mætir liðinu sem verður í þriðja sæti í riðli tvö. Samanlagður sigurvegari fer í átta liða úrslit.
