Í dag er ár þangað til að Ólympíuleikarnir verða settir í París. Vonir standa enn til þess að karlalandsliðið í handnattleik verði á meðal þátttökuliðanna 12 á leikunum. Aðeins lið tveggja þjóða eru örugg um keppnisrétt í karlaflokki, heimsmeistarar Danmerkur og gestgjafar Frakklands.
Handknattleikskeppni leikana á næsta ári verður skipt niður á tvo leikstaði. Byrjað verður í París áður en farið verður til Lille.
Tvö sæti af 12 eru frátekin
Einnig eiga lið tveggja þjóða víst sæti í handknattleikskeppni kvenna á leikunum. Auk franska landsliðsins eiga Evrópumeistarar Noregs frátekið sæti. Þetta þýðir að verði landslið Frakka og Noregs í tveimur efstu sætum HM, sem fram fer síðar á árinu, hreppir liðið í þriðja sæti sæti heimsmeistarana á Óympíuleikunum.
Árangur á EM24 skiptir máli
Sömu sögu er að segja af væntanlegu Evrópumóti karla sem haldið verður í Þýskalandi í janúar. Ef Frakkar og Danir hafna í tveimur efstu sætunum tekur bronsliðið sæti á Ólympíuleiknum. Leið íslenska landsliðsins á leikana liggur í gegnum EM 2024 eftir að eitt af efstu sætunum á HM í janúar sl. gekk liðinu úr greipum.
Álfumeistarar
Auk væntanlegra heimsmeistara í kvennaflokki og Evrópumeistara í karlaflokki öðlast álfumeistarar Afríku, Ameríku og Asíu sæti í handknattleikskeppni leikanna. Álfumótin fara fram í haust og næsta vetur.
Forkeppni í mars og apríl
Helmingur keppnisliða í hvorum flokki öðlast keppnisrétt eftir þátttöku í forkeppni sem fram fer á næsta ári.
Forkeppnin í karlaflokki verður 11. til 17. mars en 8. til 14. apríl í kvennaflokki.
Mikið undir
Leið íslenska karlalandsliðsins í forkeppnina felst í að ná sem allra bestum árangri á EM í Þýskalandi í janúar. Spánn, Svíþjóð, Þýskaland, Noregur og Ungverjaland eru þegar örugg um sæti í forkeppninni. Reyndar hefur Egyptaland einnig tryggt sér sæti í forkeppninni en verði Egyptar Afríkumeistarar losnar sæti þeirra til Evrópuþjóðar sem var næst á eftir Egyptum á HM.
Sex sinnum með frá 1972
Karlalandslið Íslands var með þegar innanhúss handknattleikur var í fyrsta skipti keppnisgrein á Ólympíuleikunum í München 1972. Síðan hefur Ísland verið með í fimm skipti, 1984, 1992, 2004, 2008 og 2012.
Silfur 2008
Mörgum er eflaust í fersku minni þegar íslenska landsliðið vann silfurverðlaun á leikunum Beijing 2008. Sextán árum áður tapaði Ísland fyrir Frakkalandi í viðureign um bronsverðlaun á Ólympíuleikunum í Barcelona. Í gær var 31 ár frá setningu leikanna í Barcelona.
Kvennahandknattleikur varð fyrst keppnisgrein á Ólympíuleikunum í Montréal í Kanada 1976. Kvennalandsliðið hefur aldrei átt þess kost að vera með.
Fróðlegt og skemmtilegt
Í tilefni þess að á síðasta ári voru liðin 50 ár frá þátttöku karlalandsliðsins á Ólympíuleikunum í Müchsen skrifaði Sigmundur Ó. Steinarsson þrjár fróðlegar og skemmtilegar greinar fyrir handbolti.is um aðdraganda og síðar þátttöku karlalandsliðsins á leikunum. Hlekki á greinar Sigmundar er að finna hér fyrir neðan.
GREIN 1: ÓL Í 50 ÁR: Benedikt flutti gleðifréttir frá Madrid
GREIN 2: ÓL Í 50 ÁR: Hjalti gaf sjóvettlinga og Geir með handleggi á „kúluliðum“!
GREIN 3: ÓL Í 50 ÁR: „Létum Tékka hafa okkur út í tóma vitleysu!“
