Stórskyttan Egill Magnússon hefur ákveðið að halda á ný í heimahagana og ganga til liðs við Stjörnuna eftir þriggja ára veru hjá FH. Frá þessu greinir Stjarnan í dag.
Egill sýndi snemma hæfileika á handknattleiksvellinum og hóf ungur að æfa handknattleik. Hann lék upp alla yngri flokka með Stjörnunni og upp í meistaraflokk. Aðeins 18 ára gamall gekk Egill til liðs við Team Tvis Holstebro og var með liðinu í tvö ár. Hann kom heim 2017 og lék með Stjörnunni í þrjú ár þangað til leiðin lá í Kaplakrika 2020.
„Egill er öflugur leikmaður sem við í Garðabænum erum gríðarlega ánægð að fá aftur heim. Hann mun styrkja lið Stjörnunnar mikið með sinni reynslu og passar vel inn í þær breytingar sem liðið er að ganga í gegnum núna,“ segir í tilkynningu Stjörnunnar í dag.
