Handknattleiksmaðurinn Geir Guðmundsson tognaði á kálfa snemma í viðureign Hauka og Fram í Olísdeild karla í handknattleik og kom ekkert meira við sögu. Hann sagði við handbolta.is í gærkvöld að útlit væri fyrir að tognunin væri það slæm að svo kunni að fara að hann taki ekki þátt í fleiri leikjum með Haukum á árinu.
Haukar eiga tvo leiki eftir í Olísdeildinni fyrir áramót, gegn HK á heimavelli 8. desember og við Stjörnuna í Mýrinni í Garðabæ sex dögum síðar. „Það er mjög vont að missa Geir út,“ sagði Ásgeir Örn Hallgrímsson þjálfari Haukaliðsins við handbolta.is eftir tapleikinn við Fram í gærkvöld, 33:23, á Ásvöllum.
Ljóst er að meiðslin koma illa við Haukaliðið sem hefur átt erfitt uppdráttar upp á síðkastið og m.a. tapað fjórum viðureignum í röð. Haukar eru í sjötta sæti með 10 stig eftir 11 leiki eins og KA sem er í sjöunda sæti.
Ég er eiginlega smá strand með þetta
Fjórði tapleikur Hauka í röð – úrslit og staðan – leikir kvöldsins
