Brúsunum og búningunum í umsjón Guðna Jónssonar liðsstjóra fækkar frá og með næsta keppnistímabili. Hann hefur nú látið af störfum við liðsstjórn hjá Val eftir 14 ár að einu ári undanskildu þegar hann vann fyrir Gróttu. Guðna þótti við hæfi að draga aðeins úr aukastörfum eftir að Valur varð Íslandsmeistari í handknattleik karla á föstudaginn.
„Ég verð all inn með landsliðinu frá og með næsta keppnistímabili,“ sagði Guðni við handbolta.is vegna tímamótanna en hann tók við liðsstjórn hjá karlalandsliðinu fyrir nokkrum árum af Ingibjörgu Ragnarsdóttur. Sem liðsstjóri er Guðni einn af mönnunum á bak við tjöldin.
„Ég hef eignast fullt af góðum vinum í gegnum þessi ár, unnið með mörgum þjálfurum, leikmönnum og stjórnarmönnum og haft ákaflega gaman af. Árangurinn þessi ár er frábær, 2 deildarmeistaratitlar, 5 bikarmeistaratitlar, komumst í 4 liða úrslit í Evrópukeppni og 2 Íslandsmeistaratitlar,“ segir Guðni m.a. í færslu á Facebook í tilefni starfsloka sinn hjá Íslandsmeisturum Vals.
