„Það verður ekki mikið af fólki eftir í Færeyjum í janúar. Það eru allavegana þrjú þúsund manns að fara frá Færeyjum til Þýskalands. Síðan eru mjög margir Færeyingar sem eru búsettir í Danmörku og í kring sem eru búnir að kaupa miða. Við erum komnir með óstaðfestar tölur um að það verði í kringum 5000 Færeyingar á leikjunum hjá þeim og það er ansi gott miðað við 55.000 manna þjóð,“ segir handknattleiksþjálfarinn Finnur Hansson í samtali við nýjast þátt Handkastsins sem kom út í gærkvöld.
Finnur er Íslendingur en hefur búið í aldarfjórðung í Færeyjum og m.a. leikið þar handknattleik og verið félagsþjálfari og einnig landsliðsþjálfari kvenna. Finnur tók við þjálfun karlaliðs Klaksvík í sumar. Fáir Íslendingar þekkja betur til færeysks handknattleiksleiks en Finnur.
Færeyska landsliðið leikur tvisvar sinnum við íslenska landsliðið í Laugardalshöll, annarsvegar annað kvöld kl. 19.30 og hinsvegar á laugardaginn klukkan 17.30. Miðasala á leikina.
Handboltinn vinsælli en fótboltinn
Færeyingar hafa tekið risastór skref fram á við síðustu árin.
„Hype-ið er gífurlegt. Handboltinn hefur aukið vinsældir sínar hér síðustu árin og það er töluvert meiri áhugi á handboltanum núna heldur en fótboltanum þrátt fyrir lið eins og KÍ í fótboltanum hefur gert ótrúlega hluti í Evrópukeppninni. Þá er handboltinn mjög ofarlega í Færeyjum,“ segir Finnur ennfremur í samtali við Handkastið. Nýjasta þáttinn er hægt að nálgast hér fyrir neðan.
