Haukur Þrastarson og félagar í pólska mestaraliðinu Łomża Industria Kielce unnu stórsigur á Al-Kuwait, 47:26, í fyrstu umferð heimsmeistaramóts félagsliða í Dammam í Sádi Arabíu í morgun. Kielce var níu mörkum yfir að loknum fyrri hálfleik, 23:14.
Haukur lék talsvert með í leiknum og skoraði m.a. tvö mörk. Nicolas Tournat var markahæstur hjá Kielce með níu mörk. Szymon Wiaderny var næstur með sjö mörk og Artsem Katalek skoraði sex sinnum.
Mótið hófst í gær og taka 12 félagslið þátt. Þar af fjögur frá Evrópu, Barcelona, Benfica, SC Magdeburg og Łomża Industria Kielce. Til viðbótar eru álfumeistarar félagsliða auk liðs frá Sádi Arabíu sem er gestgjafi mótsins í þriðja sinn. Leikið er í fjórum riðlum með þremur liðum í hverjum.
Eins og kom á handbolta.is vann Magdeburg stórsigur í gær á Sydney University. Magdeburg mætir heimaliðinu Al Khaleej á morgun.
Mótinu lýkur á sunnudaginn. Magdeburg vann Barcelona í úrslitaleik á síðasta ári.
