„Aðalatriðið er að við erum að fara í leik á EM sem skiptir máli. Ef við hefðum tapað fyrir Króatíu hefur staðan verið önnur. Okkur tókst að setja upp úrslitaleik um sæti í forkeppni Ólympíuleikanna og náð markmiðum okkar,“ sagði Bjarki Már Elísson í samtali við handbolta.is í aðdrganda leiksins við Austurríki í lokaumferð milliriðlakeppni Evrópumótsins.
„Við verðum að vinna með fimm marka mun til þess verða fyrir ofan Austurríkismenn. Annars verðum við að treysta á aðra. Ég vil forðast það að sitja stressaður á hótelinu eftir viðureignina við Austurríki og verða treysta á að Ungverjar nái stigi gegn Frökkum. Við verðum bara að stefna á fimm marka sigur,“ sagði Bjarki Már.
Löngu hættir að koma á óvart
„Austurríkismenn eru fyrir löngu hættir að koma á óvart á mótinu. Þeir töpuðu sínum fyrsta leik á mótinu gegn Frökkum á mánudaginn. Þeir eru með gott lið og leika á sömu leikmönnum frá upphafi til enda. Þreytu virðist ekkert gæta á meðal þeirra. Þetta er hættulegri andstæðingur.
Ég hef trú á að við séum með betra lið. Við eigum að geta náð fimm marka sigri, ekki síst með hjálp Sérsveitarinnar sem ég vil sérstaklega þakka fyrir að hafa fylgt okkur allt mótið. Við erum Sérsveitinni gríðarlega þakklátir fyrir frábæran stuðning. Þau eru svo sannarlega með okkur í liði,“ sagði Bjarki Már Elísson landsliðsmaður í handknattleik í samtali við handbolta.is.
EM 2024 – leikjadagskrá, úrslit, staðan – milliriðlar
