Andstæðingur Aftureldingar, Tatran Presov, hefur verið yfirburðalið í handknattleik karla í Slóvakíu alla þessa öld. Aðeins einu sinni frá árinu 2004 hefur annað lið orðið meistari í Slóvakíu.
Tatran Presov er efst í úrvalsdeildinni um þessar mundir með 14 stig að loknum sjö leikjum.
Tatran kemur frá borginni Presov sem er þriðja stærsta borg Slóvakíu, með um 90 þúsund íbúa (2020). Borgin er í austurhluta landsins, um 30 km norður af Košice, næststærstu borg Slóvakíu.
Voru í Evrópudeildinni
Á síðasta keppnistímabili átti Tatran Presov sæti í riðlakeppni Evrópudeildarinnar. Andstæðingar í riðlinum voru: Montpellier, Kadetten Schaffhausen, Fejer B.A.L-Veszprem, Göppingen, Benfica.
Tatran vann tvo leiki, gerði eitt jafntefli og tapaði sjö sinnum og féll úr leik eftir riðlakeppnina.
Evrópudeildin – 10. umferð: úrslit, staðan, 16-liða úrslit
Vann FH naumlega
Tatran Presov hefur mætt íslenskum félagsliðum af og til í gegnum tíðina í Evrópukeppni. Síðast lék FH við Tatran Presov síðla árs 2017. Presov vann heimaleikinn, 24:21, en FH hafði betur í Kaplakrika, 26:23. Tatran komst áfram á fleiri mörkum skoruðum á útivelli en sú regla hefur verið felld úr gildi.
Öruggur sigur á Tékkum
Í 2. umferð Evrópubikarkeppninnar sló Tatran Presov út tékkneska liðið HK FCC Mesto Lvosice samanlagt, 68:54 (32:28 og 36:26). Síðari leikurinn var í Presov um nýliðna helgi.
Leikmenn liðsins eru að uppistöðu til Slóvakar og Tékkar. Pavol Jano tók við þjálfun liðsins í sumar.
Leikir 3. umferðar eða 32 liða úrslita, eiga að fara fram 25. og 26. nóvember og 2. og 3. desember. Innan nokkurra daga ætti að skýrast hvort liðin nýta heimaleikjarétt sinn eða kjósa að leika báða leikina heima eða að heiman. Ef leikið verður heima og að heima fer fyrri leikurinn fram á heimavelli Aftureldingar.
