„Við erum staðráðnar í að komast á lokakeppni EM eftir rúmt ár og til þess að leggja grunn að því verðum við að vinna báða leikina í þessari lotu, gegn Lúxemborg og Færeyjum. Þess vegna erum við í núinu þótt annað stórt verkefni bíði okkar síðar á tímabilinu. Þessa stundina er hugur okkar við leikinn gegn Lúxemborg á miðvikudaginn,“ sagði Perla Rut Albertsdóttir leikmaður Selfoss og landsliðskona í samtali við handbolta.is.
Annað kvöld, klukkan 19.30, mætir íslenska landsliðið Lúxemborgurum í upphafsleik 7. riðils undankeppni Evrópumótsins í handknattleik kvenna á Ásvöllum. Fyrirfram er reiknað með að íslenska landsliðið sé talsvert öflugra.
„Það er alltaf erfitt að mæta andstæðingi sem fyrirfram er talinn veikari. Ekki síst eins og í þessu tilfelli þegar í hlut á andstæðingur sem við höfum aldrei mætt áður. Við verðum að sýna okkar rétta andlit til þess að vinna leikinn, hvað þá ef við ætlum að vinna öruggan sigur,“ sagði Perla Ruth sem leikur sinn 33. landsleik annað kvöld ef hún verður í keppnishópnum.
Arnar Pétursson landsliðsþjálfari valdi 21 leikmann til undirbúnings og þátttöku í leikjunum tveimur, gegn Lúxemborg og Færeyjum í Þórshöfn á sunnudaginn. Af þeim getur Arnar teflt 16 leikmönnum fram í hvorum leik.
„Það er ákveðin kúnst að mæta liði sem fyrirfram er talið veikara. Oft er auðveldara að gíra sig upp í leiki gegn andstæðingi sem talinn er á svipuðu róli eða sterkari. Við erum staðráðnar í að stíga næsta skref til framfara í næstu tveimur leikjum. Það hefur verið stígandi í okkar leik og markmiðið er að framhald verði á framförum,“ sagði Perla Ruth Albertsdóttir landsliðskona í samtali við handbolta.is.
Viðureign Íslands og Lúxemborgar hefst klukkan 19.30 á Ásvöllum á miðvikudaginn. Frítt verður á leikinn í boði Boozt.com, eins af samstarfsfyrirtækjum HSÍ.
Lena Margrét hleypur í skarðið fyrir Birnu Berg
Hópur valinn fyrir fyrstu leikina í undankeppni EM
Koma til Íslands sex árum eftir endurreisn – í fyrsta sinn í undankeppni EM
Fyrsti liður í undirbúningi fyrir stærra verkefni
