Anna Karen Hansdóttir hefur framlengt samning sinn við Olísdeildarlið Stjörnunnar. Anna Karen er vinstri hornamaður sem kom til Stjörnunnar fyrir tímabilið haustið 2020. Hún er fjórði markahæsti leikmaður Stjörnuliðsins á tímabilinu með 56 mörk í 19 leikjum Olísdeildar. Um leið hefur Anna Karen minnt á sig sem ein af betri vinstri hornamönnum deildarinnar.
Anna Karen er alin upp í Danmörku. Hún æfði og lék með Egebjerg IF, Skanderborg og Horsens Handboldklub áður hún gekk til liðs við Stjörnuna fyrir nærri þremur árum. Anna Karen á leiki með yngri landsliðum Íslands.
„Hún hefur verið einn besti leikmaður sinnar stöðu síðustu ár í Olísdeildinni, hefur mikinn metnað og er frábær fyrirmynd bæði innan sem utan vallar. Anna Karen er frábær leikmaður sem Stjarnan er stolt af að hafa áfram í sínum röðum,“ segir m.a. í tilkynningu Stjörnunnar.
Anna Karen er systir Steinunnar Hansdóttur sem leikur nú með Skanderborg Håndbold í úrvalsdeildinni í Danmörku og leikið nokkra leiki með A-landsliði Íslands.
