„Það er þvílíkur léttir fyrir okkur að vinna þennan leik því okkur langar svo mikið að vera áfram í þessari deild,“ sagði Ída Margrét Stefánsdóttir markahæsti leikmaður Gróttu í kvöld í níu marka sigri liðsins á Stjörnunni, 30:21, í þriðja síðasta leik liðanna í Olísdeildinni á leiktíðinni. Ída Margrét skoraði átta mörk en með sigrinum komst Grótta í átta stig. Liðið situr áfram í neðsta sæti en á áfram von um að bjarga sér frá falli.
„Við lögðum allt í leikinn í kvöld, skildum allt eftir á parketinu,“ sagði Ída Margrét.
„Við höfum lagt hart að okkur að ná þessari frammistöðu sem við sýndum í kvöld,“ sagði Ída Margrét og tók undir með blaðamanni að leikmenn Gróttu hafi verið eins grenjandi ljón frá upphafi til enda leiksins.
Loksins sigur á heimavelli
Grótta hefur tapað nokkrum stigum á síðustu sekúndum og mínútum í leikjum sínum í vetur. „Ekki síst vorum við svekktar að vinna ekki á Selfossi um daginn. Þá brenndum við tveimur dauðafærum í lokin og fórum heim með annað stigið. Okkur langaði að vinna loksins leik á heimavelli eftir nokkur jafntefli hérna,“ sagði Ída Margrét sem er ekki í vafa hvað framtíðin ber í skauti sér hjá Gróttu.
„Við ætlum bara að vinna Val og ÍR og halda sæti okkar í deildinni. Það er stefnan.“
Lengra viðtal við Ídu Margréti er að finna í myndskeiði hér fyrir ofan.
Staðan og næstu leikir í Olísdeildum.
Varnarleikurinn var skelfilegur
