Sænska landsliðið vann sér í fyrsta sinn keppnisrétt í undanúrslitum handknattleikskeppni kvenna á Ólympíuleikunum með afar öruggum sigri á Suður Kóreu í morgun, 39:30. Svíar mæta annað hvort Hollandi eða Frakklandi í undanúrslitum á föstudaginn en síðasta viðureign átta liða úrslita hefst klukkan 11.45.
Sænska landsliðið sló liðsmenn Suður Kóreu út af laginu strax í upphafi leiks með sterkum varnarleik. Svíar skouðu átta af fyrstu tíu mörkum leiksins. Suður Kóreuliðið náði sér aldrei á strik og var átta mörkum undir í hálfleik, 21:13.
Í síðari hálfleik var munurinn mestur 13 mörk. Svíar slökuðu á klónni á lokakaflanum, ekki síst í vörninni. Það kom ekki að sök þar sem yfirburðirnir voru miklir.
Carin Strömberg og Linn Blohm voru markahæstar með sex mörk hvor. Mathilda Lundström, Elin Hansson og Jenny Carlson skoruðu fjögur mörk hvor. Kristín Þorleifsdóttir, sem á íslenska foreldra, skoraði eitt mark en allir útileikmenn sænska liðsins skoruðu í leiknum.
Kyungmin Kang skoraði átta fyrir Suður Kóreu sem er úr leik. Jinyi Kim var næst með sjö mörk.
