Ethel Gyða Bjarnasen, markvörður, og Valgerður Arnalds, leikstjórnandi, hafa skrifað undir nýja samninga við Fram. Gilda samningarnir til næstu þriggja ára.
Ethel Gyða, fædd 2005, er einn efnilegasti markmaður landsins og er nú að spila sitt annað tímabil með Fram en hún var áður með HK. Ethel Gyða hefur einnig verið með yngri landsliðum á liðnum árum, til að mynda með U20 ára liðinu sem tók þátt á heimsmeistaramóti kvenna í Skopje í Norður Makedóníu í fyrrasumar. Íslenska liðið hafnaði í 7. sæti.
Valgerður Arnalds, fædd 2004, er leikstjórnandi og uppalin hjá Fram. Hún hefur leikið stórt hlutverk í yngri flokkum félagsins og gegnir nú mikilvægu hlutverki í meistaraflokki félagsins. Þá hefur hún æft og leikið með yngri landsliðunum.
„Ethel Gyða og Valgerður eru báðar máttarstólpar í Fram og það er því ánægjulegt að sjá þær framlengja samninga sína hjá félaginu. Fram er og verður félag sem gefur ungum leikmönnum færi á að þróast enn frekar sem öflugir leikmenn og báðar eru þær dæmi um leikmenn sem við getum fylgst stolt með,“ er haft eftir Rakel Dögg Bragadóttur þjálfara Fram í tilkynningu félagsins.
Fram sækir Selfoss heim í síðustu umferð Olísdeildar kvenna klukkan 19.30 í kvöld.
