- Auglýsing -
- Línumaðurinn Victor Máni Matthíasson hefur gengið til liðs við Fjölni sem leikur í Grill66-deildinni. Hann kemur frá Víkingi og hefur skrifað undir tveggja ára samning við Grafarvogsliðið. Victor er fæddur árið 1999 og lék tvo leiki með Víkingi á síðasta keppnistímabili.
- Annar handknattleiksmaður sem eitt sinn lék með Fjölni, Sveinn Jóhannsson, var markahæstur með sex mörk þegar lið hans, SønderjyskE, vann Ystads IF, 34:30, í æfingaleik í fyrradag.
- Valur og þýska 1. deildarliðið BSV Sachsen Zwickau gerðu jafntefli í æfingaleik kvennna í handknattleik í Origo-höllinni í gærkvöld. Díana Dögg Magnúsdóttir, fyrrverandi leikmaður Vals, leikur með Zwickau-liðinu sem hefur verið í æfingabúðum hér á landi síðustu vikuna, lengst af í Vestmannaeyjum. Zwickau-liðið heldur af landi brott í dag.
- Jóhan á Plógv Hansen verður á morgun fyrsti Færeyingurinn til þess að vinna til verðlauna á Ólympíuleikum. Hansen er fæddur í Færeyjum og á færeyska foreldra en kaus fremur að leika fyrir danska en færeyska landsliðið. Hann fer með gull- eða silfurverðlaunapening heim eftir úrslitaleikinn í handknattleikskeppni karla á morgun.
- Hugo Descat heldur áfram að nýta sín tækifæri til þess að skora í leikjum franska landsliðsins á Ólympíuleikunum. Hann skoraði fimm mörk í fimm tilraunum í gær þegar Frakkar lögðu Egypta í undanúslitum. Þar af skoraði Descat fjögur mörk úr vítaköstum og hefur þar með nýtt öll 14 vítkaköst sín á leikunum. Aðeins eitt skot hefur geigað hjá Descat af 30 skotum sem hann hefur átt á markið.
- Auglýsing -
