Matthías Daðason tryggði Fram annað stigið í leiknum við Aftureldingu í Olísdeild karla í handknattleik í Safamýri í kvöld. Hann skoraði úr vítakasti þegar leiktíminn var úti og jafnaði metin, 27:27. Andri Már Rúnarsson vann vítakast fyrir Fram í þann mund sem leiktíminn rann út eftir að Þorsteinn Leo Gunnarsson hafði brotið á honum.
Þar með náði Fram í sitt fyrsta stig í Olísdeildinni á leiktíðinni. Aftureldingarmenn eru hinsvegar með þrjú stig eftir leikinn í kvöld sem var jafn og spennandi allan síðari hálfleikinn.
Mosfellingar voru heldur með frumkvæðið í fyrri hálfleik og höfðu tveggja marka forystu þegar flautað var til hálfleiks, 15:13. Fram jafnaði fljótlega í síðari hálfleik og eftir það var jafnt á nær öllum tölum allt til loka. Síðustu sekúndurnar voru æsilega spennandi.
Þorgrímur Smári Ólafsson og Andri Már Rúnarsson skoruðu fjögur mörk hvor fyrir Fram og voru atkvæðamestir á þeim vettvangi.
Sveinn Andri Sveinsson og Bergvin Þór Gíslason voru markahæstir hjá Aftureldingu. Þeir skoruðu sex mörk hvor.
