ÍBV er úr leik í úrslitakeppni Olísdeildar karla í handknattleik eftir tap fyrir Aftureldingu, 27:25, í öðrum leik liðanna í íþróttamiðstöðinni í Vestmannaeyjum í kvöld. Í jöfnum og spennandi baráttuleik skoruðu Mosfellingar tvö síðustu mörkin og sendu þar með Eyjamenn í sumarfrí. Nokkur ár eru liðin síðan ÍBV var ekki á meðal liðanna í undanúrslitum Olísdeildar.
Afturelding mætir Val í undanúrslitum sem hefjast 16. apríl eða 17. apríl. Valur lagði Stjörnuna, 32:28, eftir framlengda viðureign í Hekluhöllinni í kvöld.
Afturelding var heldur með frumkvæðið í jöfnum leik í Eyjum. M.a. voru Aftureldingarmenn marki yfir í hálfleik, 15:14.
Blær Hinriksson og Einar Baldvin Baldvinsson kunnu vel við sig á fjölum íþróttamiðstöðvarinnar í Vestmannaeyjum. Einar Baldvin varði 19 skot í marki Aftureldingar, 47,5%. Blær skoraði 11 mörk og mætti svo sannarlega með fullt sjálfstraust til leiks eins og hann var staðráðinn í þegar hann ræddi við handbolta.is eftir fyrri leik liðanna að Varmá á laugardaginn.
Birgir Steinn Jónsson var einnig öflugur með sex mörk og 10 sköpuð færi.
Dagur Arnarsson og Petar Jokanovic voru bestir leikmanna ÍBV.
Mörk ÍBV: Dagur Arnarsson 9/4, Daniel Esteves Vieira 5, Gauti Gunnarsson 4, Sveinn Jose Rivera 3, Andri Erlingsson 2, Sigtryggur Daði Rúnarsson 1, Nökkvi Snær Óðinsson 1.
Varin skot: Petar Jokanovic 18, 40,9%.
Mörk Aftureldingar: Blær Hinriksson 11/4, Birgir Steinn Jónsson 6, Ihor Kopyshynskyi 3, Kristján Ottó Hjálmsson 2, Þorvaldur Tryggvason 2, Árni Bragi Eyjólfsson 1, Hallur Arason 1, Stefán Magni Hjartarson 1.
Varin skot: Einar Baldvin Baldvinsson 19/1, 47,5% – Brynjar Vignir Sigurjónsson 0.
Tölfræði leiksins hjá HBStatz.
