Haukur Þrastarson varð í dag rúmenskur bikarmeistari í handknattleik karla þegar lið hans Dinamo Búkarest vann Potaissa Turda, 39:27, í úrslitaleik keppninnar í Búkarest. Dinamo var fimm mörkum yfir í hálfleik.
Haukur, sem tók ekki þátt í undanúrslitaleiknum í gær, mætti galvaskur til leiks í dag og skoraði fimm mörk og gaf tvær stoðsendingar. Andrii Akimenko skoraði einnig fimm mörk. Egyptinn Ali Zein var markahæstur með níu mörk.
Þetta var í níunda sinn sem Dinamo Búkarest vinnur bikarkeppnina, þar af í fimmta skipti á síðustu sex árum.
Haukur hefur nú orðið bikarmeistari í tveimur löndum, Póllandi og Rúmeníu. Hann flytur til Þýskalands í sumar.
Mimaur Baia Mare, sem tapaði fyrir Dinamo í undanúrslitum, vann CSM Búkarest í viðureign um þriðja sætið, 27:23.
