Íslandsmeistarar síðasta árs, FH, eru komnir í erfiða stöðu í undanúrslitarimmunni við Fram eftir annað tap í kvöld, 22:19, í viðureign liðanna í Lambhagahöllinni. Fram getur sópað FH út á fimmtudagskvöldið, að kveldi fyrsta sumardags, í Kaplakrika takist FH-ingum ekki að snúa vörn í sókn.
Framarar skoruðu fjögur síðustu mörk leiksins í kvöld sem var annars afar jafnt og spennandi. Ásbjörn Friðriksson kom FH marki yfir, 19:18, þegar hálf sjötta mínúta var til leiksloka. Eftir það tókst FH-liðinu ekki svara fyrir sig.
Skarð var svo sannarlega fyrir skildi hjá FH að Jóhannes Berg Andrason, einn besti leikmaður Olísdeildarinnar á keppnistímabilinu, lék ekki með vegna meiðsla.
Fram byrjaði leikinn mikið betur og skoraði fjögur af fyrstu fimm mörkunum. Áfram hélt liðið frumkvæðinu framan af hálfleinum áður en leikmenn FH blesu í herlúðra og náðu jafnri stöðu, 11:11, áður en hálfleikurinn var út. FH skoraði sex af síðustu átta mörkunum.
Í síðari hálfleik var staðan meira og minna jöfn allt þar á allra síðustu mínútu að Fram hafði fleiri ása upp í erminni.
Breki Hrafn Árnason varði vel í marki Fram og sömu sögu má segja um kollega hans hinum megin vallarins, Daníel Frey Andrésson.
Mörk Fram: Marel Baldvinsson 6, Reynir Þór Stefánsson 3, Ívar Logi Styrmisson 3/1, Eiður Rafn Valsson 3, Kjartan Þór Júlíusson 3, Theodór Sigurðsson 2, Rúnar Kárason 1, Dagur Fannar Möller 1.
Varin skot: Breki Hrafn Árnason 9, 52,9% – Arnór Máni Daðason 2/1, 16,7%.
Mörk FH: Leonharð Þorgeir Harðarson 4, Jakob Martin Ásgeirsson 3, Jón Bjarni Ólafsson 3, Símon Michael Guðjónsson 3/3, Ásbjörn Friðriksson 2, Garðar Ingi Sindrason 2, Garðar Ingi Sindrason 2.
Varin skot: Daníel Freyr Andrésson 15/2, 40,5%.
Tölfræði leiksins hjá HBStatz.
