Portúgalska meistaraliðið Sporting frá Lissabon, sem Orri Freyr Þorkelsson leikur með, á góða möguleika á að tryggja sér sæti í undanúrslitum Meistaradeildar karla í handknattleik þrátt fyrir eins marks tap fyrir Nantes í Frakklandi í gærkvöld, 28:27, í fyrri leiknum í átta liða úrslitum keppninnar.
Síðari viðureignin fer fram í Lissabon eftir viku og Sporting-liðið er ekki gjarnt á að tapa á heimavelli.
Orri Freyr skoraði eitt mark fyrir Sporting í gær.
Nantes var með yfirhöndina frá upphafi til enda. Staðan var 13:10, í hálfleik. Í síðari hálfleik dró frekar í sundur með liðunum framan af áður en Sporting-liðið náði gagnsókn í lokin og tókst að minnka muninn í eitt mark.
Martím Costa skoraði 8 mörk fyrir Sporting og Aymeric Minne skoraði sjö sinnum fyrir Nantes.
Sporting hefur aldrei komist í undanúrslit Meistaradeildar Evrópu. Nantes náði þeim áfanga 2018 og lék til úrslita við Montpellier.
