Selfoss gerði sér lítið fyrir og lagði Gróttu öðru sinni í umspili Olísdeildar karla í handknattleik í gærkvöld, 37:35, þegar liðin mættust í Hertzhöllinni á Seltjarnarnesi. Selfyssingar hafa þar með náð yfirhöndinni í einvíginu um sæti í Olísdeildinni á næstu leiktíð. Þeir hafa tvo vinninga gegn einum vinningi Gróttu sem á sæti í Olísdeildinni að verja. Selfoss lék í Grill 66-deildinni í vetur sem leið.
Fjórða viðureign liðanna fer fram í Sethöllinni á Selfossi á sunnudagskvöld. Flautað verður til leiks klukkan 19.30.
Leikmenn Selfoss komu ákveðnir til leiks á Seltjarnarnesi og voru með þriggja marka forskot þegar fyrri hálfleikur var að baki, 21:18. Áfram héldu gestirnir að vera með yfirhöndina í síðari hálfleik allt þar til Ágúst Ingi Óskarsson jafnaði metin fyrir Gróttu, 30:30, þegar 11 mínútur voru til leiksloka. Lengra náðu leikmenn Gróttu ekki. Selfyssingar skoruðu þrjú mörk í röð og héldu forskoti sínu til leiksloka.
Mörk Gróttu: Ágúst Ingi Óskarsson 13/1, Jakob Ingi Stefánsson 7/1, Antoine Óskar Pantano 4, Hafsteinn Óli Ramos Rocha 3, Gísli Örn Alfreðsson 3/2, Jón Ómar Gíslason 2, Sæþór Atlason 2, Hannes Grimm 1.
Varin skot: Hannes Pétur Hauksson 4, 12,9% – Magnús Gunnar Karlsson 3, 23,1%.
Mörk Selfoss: Tryggvi Sigurberg Traustason 8, Hannes Höskuldsson 7, Alvaro Mallols Fernandez 6, Jónas Karl Gunnlaugsson 4, Jason Dagur Þórisson 4, Valdimar Örn Ingvarsson 4, Anton Breki Hjaltason 2, Sölvi Svavarsson 1, Elvar Elí Hallgrímsson 1.
Varin skot: Alexander Hrafnkelsson 15/2, 30,6% – Jón Þórarinn Þorsteinsson 1/1, 100%.
Tölfræði HBStatz.
