Framarar virðast hafa gleymt sópnum heima í Lambhagahöllinni þegar þeir mættu til leiks við FH í Kaplakrika í gærkvöldi. Eftir tvo sigurleiki í röð þá féll leikmönnum Fram allur ketill í eld að þessu sinni gegn ákveðnum FH-ingum sem unnu með 16 marka mun, 36:20. Leikmenn FH réðu lögum og lofum frá fyrstu mínútu og höfðu níu marka forystu þegar fyrri hálfleikur var að baki, 18:9.
Fjórða viðureign liðanna fer fram í Lambhagahöllinni í Úlfarsárdal á sunnudagskvöld. Eins og áður þá skortir Fram-liðið einn sigur til þess að komast í úrslit Íslandsmótsins. Hagur FH vænkaðist og þarf tvo sigra í viðbót til þess að slá Fram út og mæta annað hvort Val eða Aftureldingu í úrslitarimmu um meistaratitilinn.
Leikmenn FH, sem varð Íslandsmeistari fyrir ári og deildarmeistari á dögunum, voru með bakið upp vegginn kalda í upphafi leiksins. Þeir voru greinilega staðráðnir að leyfa Fram-liðinu ekki að vinna annan leikinn í röð í Kaplakrika. Tónninn var sleginn strax í upphafi. FH-ingar léku við hvern sinn fingur meðan Framarar voru í mesta basli.
Mörk FH: Ásbjörn Friðriksson 10/3, Garðar Ingi Sindrason 5, Jón Bjarni Ólafsson 4, Einar Örn Sindrason 4, Leonharð Þorgeir Harðarson 3, Gunnar Kári Bragason 3, Þórir Ingi Þorsteinsson 3, Jakob Martin Ásgeirsson 1, Birgir Már Birgisson 1, Símon Michael Guðjónsson 1.
Varin skot: Daníel Freyr Andrésson 12, 46,2% – Birkir Fannar Bragason 2, 25%.
Mörk Fram: Ívar Logi Styrmisson 5/2, Kjartan Þór Júlíusson 4, Eiður Rafn Valsson 3, Max Emil Stenlund 2, Reynir Þór Stefánsson 2, Dagur Fannar Möller 1, Kristófer Tómas Gíslason 1, Lúðvík Arnkelsson 1, Marel Baldvinsson 1.
Varin skot: Breki Hrafn Árnason 7, 25% – Arnór Máni Daðason 3, 20%.
