„Við mættum ekki nógu vel stemmdar og vorum í erfiðleikum,“ sagði Rakel Dögg Bragadóttir þjálfari Fram eftir 12 marka tap fyrir Haukum í fyrsta undanúrslitaleik liðanna í Olísdeild kvenna í handknattleik í Lambhagahöllinni síðdegis, 30:18.
„Berglind [Þorsteinsdóttir] var ekki með vegna meiðsla og Kristrún [Steinþórsdóttir] hefur verið meidd og ekkert leikið upp á síðkastið. Þar af leiðandi fundum við ekki taktinn í vörninni sem kom okkur í vesen og flutttist með okkur yfir miðlínuna í sóknarleikinn. Þetta verðum við að skoða og vinna í að bæta. Staðan er bara eitt núll fyrir Hauka svo það er nóg af leikjum eftir,“ sagði Rakel Dögg og benti á að Fram-liðið gæti gert margt betur fram að næsta leika yrði leitað lausna.
Rakel Dögg bætti við að engin ástæða væri að örvænta. Framliðið gæti gert betur og þegar það næði sér á strik stæði það Haukum síst að baki.
„Þetta eru tvö jöfn lið. Við hittum bara ekki á okkar dag meðan Haukar hittu á sinn góða dag. Nú er það okkar að finna lausnirnar fyrir næsta leik á þriðjudaginn,“ sagði Rakel Dögg Bragadóttir þjálfari Fram.
Lengra viðtal við Rakel Dögg er að finna í myndskeiði ofar í þessari grein.
Sjá einnig:
Olís kvenna: Leikjadagskrá, úrslitakeppni 2025
