„Ég er ofboðslega stoltur af liðinu mínu. Það lagði allt í leikinn en niðurstaðan er sannarlega svekkjandi og súr,“ sagði Sigursteinn Arndal þjálfari FH í samtali við handbolta.is í Lambhagahöllinni í kvöld eftir að FH tapaði með minnsta mun fyrir Fram eftir tvær framlengingar í fjórða undanúrslitaleik liðanna í úrslitakeppni Olísdeildar karla í handknattleik, 34:33.
„Menn lögðu allt sitt í leikinn og ég ekki ekki nógu sterk orð til þess að hrósa liðinu mínu fyrir veturinn sem hefur verið svakalegur. Það hefur gengið á ýmsu,“ sagði Sigursteinn.
FH-ingar áttu undir högg að sækja lengst af í kvöld en sýndi mikla baráttu þegar kom fram í síðari hálfleik, vann upp fimm marka forskot Fram-liðsins og var síðan í hnífjöfnum tveimur framlengingum.
„Ég er mjög ánægður með seigluna í mínu liði. Svo fór þetta á einu marki í lokin. Við töpuðum fyrir mjög góði Framliði. Ég vil nota tækifærið til þess þakka þeim fyrir og óska þeim góðs gengis í framhaldinu,“ sagði Sigursteinn Arndal þjálfari FH.
Lengra viðtal við Sigurstein er í myndskeiði ofar í þessari grein.
Erum að uppskera eins og við höfum sáð til
Olís karla: Leikjadagskrá, úrslitakeppni 2025
Arnór Máni var hetja Fram – varði vítakast í lok annarrar framlengingar
