Íslandsmeistarar Vals unnu annan stórsigur á ÍR í kvöld í undanúrslitum Olísdeildar kvenna í handknattleik, 32:19, eftir að hafa verið 11 mörkum yfir að loknum fyrri hálfleik, 19:8.
Valur hefur þar með tvo vinninga og getur bundið enda á einvígið á föstudaginn með þriðja sigrinum á heimavelli.
Eftir 21 marks sigur í fyrsta leik liðanna á laugardaginn þá hóf Valur leikinn af krafti í kvöld. Liðið skoraði fjögur fyrstu mörkin og fimm af þeim fyrstu sex. Þar með var tónninn sleginn í Skógarseli.
Út í gegn var um einstefnu að ræða hjá hinu sterka liði Vals. Þegar kom fram í síðari hálfleik gaf Ágúst Þór Jóhannsson þjálfari óreyndari leikmönnum liðsins eftir sviðið í meira mæli.
Ljóst er að þátttakan í undanúrslitum er of stór biti fyrir lítt reynt ÍR-liðið. Slæm byrjun í fyrsta leiknum á laugardaginn varð ekki til þess að létta liðinu róðurinn eða efla trúna á verkefninu.
Mörk ÍR: Katrín Tinna Jensdóttir 6, Sara Dögg Hjaltadóttir 5, Sylvía Sigríður Jónsdóttir 3/2, Anna María Aðalsteinsdóttir 2, Erla María Magnúsdóttir 1, Vaka Líf Kristinsdóttir 1, Matthildur Lilja Jónsdóttir 1.
Varin skot: Ingunn María Brynjarsdóttir 5, 14,3% – Natalía Nótt Kaaber 2/1, 50%.
Mörk Vals: Thea Imani Sturludóttir 8, Þórey Anna Ásgeirsdóttir 7/4, Lovísa Thompson 6, Elín Rósa Magnúsdóttir 3, Sigríður Hauksdóttir 2, Hildigunnur Einarsdóttir 2, Arna Karitas Eiríksdóttir 1, Hildur Björnsdóttir 1, Ásthildur Jóna Þórhallsdóttir 1, Guðrún Hekla Traustadóttir 1.
Varin skot: Hafdís Renötudóttir 12/1, 50% – Silja Müller Arngrímsdóttir 2, 25%.
Tölfræði leiksins hjá HBStatz.
Olís kvenna: Leikjadagskrá, úrslitakeppni 2025
