Evrópumeistarar Barcelona mæta SC Magdeburg í undanúrslitaleik Meistaradeildar Evrópu í handknattleik í Lanxess Arena í Köln 14. júní. Dregið var til undanúrslita í dag en átta liða úrslitum lauk í gærkvöld, m.a. með ævintýralegum sigri Magdeburg á Veszprém í Ungverjalandi, 28:27, hvar Gísli Þorgeir Kristjánsson skoraði sigurmarkið.
Mættust fyrir tveimur árum
Magdeburg, sem Ómar Ingi Magnússon leikur einnig með, og Barcelona mættust einnig í undanúrslitaleik Meistaradeildar Evrópu fyrir tveimur árum. Magdeburg vann eftir vítakeppni og lék daginn eftir til úrslita og lagði Indurtria Kielce, 30:29.
Frammistaða Gísla Þorgeirs í leikjunum var eftirminnileg en hann fór út axlarlið í undanúrslitaleiknum en mætti engu að síður í úrslitaleikinn og gerði gæfumuninn. Gísli Þorgeir var valinn mikilvægasti leikmaður úrslitahelgarinnar fyrir frammistöðu sína.
Í hinni undanúrslitaviðureigninni laugardaginn 14. júní eigast við þýska liðið Füchse Berlin og Nantes frá Frakklandi. Berlínarliðið er í undanúrslitum í fyrsta sinn í 13 ár en Nantes náði síðast svona langt í Meistaradeildinni fyrir sjö árum.
Barcelona vann Meistaradeildina fyrir ári með því að leggja Aalborg Håndbold í úrslitaleik, 31:30. THW Kiel vann Magdeburg í viðureign um bronsverðlaunin, 32:28.
Sjá einnig: Gísli Þorgeir skaut Magdeburg til Kölnar
Valdir kaflar: Ævintýralegur sigur Magdeburg og sigurmark Gísla Þorgeirs
