Þýska handknattleiksliðið Blomberg-Lippe sem Andrea Jacobsen og Díana Dögg Magnúsdóttir leika með fékk slæman skell í undanúrslitaleik Evrópudeildarinnar í Graz í Austurríki í dag. Liðið tapaði með 10 marka mun, 28:18, fyrir Ikast Håndbold eftir að hafa einnig verið 10 mörkum undir í hálfleik, 16:6. Afleitur fyrri hálfleikur gerði út um vonir Blomberg-liðsins.
Þetta er aðeins annað tap Blomberg-Lippe í keppninni á leiktíðinni.
„Við náðum að skapa okkur færi en gekk afar illa að skora úr færunum,“ sagði Díana Dögg við handbolta.is eftir leikinn.
Síðar í dag kemur í ljós hvort hvort andstæðingurinn í viðureigninni um bronsið á morgun verður þýska liðið Thüringer eða JDA Bourgogne Dijon Handball frá Frakklandi. Franska og þýska liðið kljást í hinni viðureign undanúrslitanna.
Andrea skoraði eitt mark en Díana Dögg ekkert en þær áttu fjögur markskot hvor um sig samkvæmt tölfræði leiksins á vef EHF. Díana átti eina stoðsendingu, skapaði þrjú færi og vann eitt vítakast.
Uppfært: Blomberg-Lippe mætir JDA Bourgogne Dijon Handball frá Frakklandi á morgun í leiknum um bronsið. Dijon tapaði fyrir Thüringer, 35:29, í síðari undanúrslitaleiknum.
Ida Margrethe Hoberg Rasmussen, sem lék KA/Þór um skeið fyrir um tveimur árum, náði heldur ekki að skora fyrir þýska liðið sem var að leika í undanúrslitum Evrópukeppni í fyrsta sinn í 16 ár.
