„Það á eflaust eftir að koma aðeins aftan að manni næstu daga að nú sé þetta búið,“ sagði Steinunn Björnsdóttir leikmaður Fram og landsliðskona í samtali við handbolta.is í kvöld eftir að hún hafði leikið sinn síðasta leik á ferlinum eftir langan og sigursælan feril.
„Nú bíður mín aðeins stærra verkefni vegna þess að ég á von á mínu þriðja barni. Sem betur fer verður hugur minn upptekinn við annað, stærra og skemmtilegra verkefni næstu vikur og mánuði,“ sagði Steinunn ennfremur en hún er gengin 13 vikur.
Átti ekki marga leiki eftir
„Ég hefði ekki átt marga leiki eftir á handboltavellinum en engu að síður er svekkjandi að ná einvíginu við Hauka ekki í oddaleik,“ sagði Steinunn sem lék sína síðustu landsleiki fyrir fjórum vikum.
Erfitt að elta Hauka
„Þetta var hörkuleikur allan tímann. Haukar voru skrefinu á undan í báðum hálfleikum en okkur tókst að jafna undir lok fyrri hálfleiksins. Haukar voru á undan í síðari hálfleik og það er mjög erfitt að elta Haukaliðið,“ sagði Steinunn um leikinn í kvöld.
Gátum náð lengra
„Að undanskildum fyrsta leiknum fannst mér varnarleikur okkar vera mjög góður í einvíginu. Það var ekkert eðlilega gaman að leika þessa vörn sem við vorum að leika. Ég er stolt af liðinu að hafa komið til baka eftir fyrsta leikinn við Hauka sem var mjög slæmur. Framliðið er mjög gott og hefði geta náð lengra,“ sagði Steinunn sem reiknar með að í framtíðinni segi hún ekki alveg skilið við handboltann þótt nóg sé komið af harpixinu.
Njóta hversdagsleikans
„Ég ætla að ala upp börnin mín og njóta hversdagsleikans sem maður hefur aðeins misst af. Ég hef ekki alveg sagt skilið við boltann. Ég mun verða í einhverskonar hlutverki einhverntímann,“ sagði Steinunn Björnsdóttir í viðtali við handbolta.is á Ásvöllum í kvöld.
Lengra viðtal við Steinunni er í myndskeiði hér fyrir ofan.
Sjá einnig: Þórey Rósa og Steinunn léku sína síðustu leiki
Haukar leika til úrslita við Val
