U19 ára landslið karla hefur í dag keppni á Evrópumótinu í handknattleik í Króatíu. Upphafsleikurinn verður gegn Slóvenum. Flautað verður til leiks klukkan 12.30 og verður mögulegt að fylgjast með viðureigninni í beinni útsendingu á ehftv.com.
Íslenska landsliðið kom til Varazdin í Króatíu í fyrrakvöld og æfði saman í keppnishöllinni í gær. Neðangreint myndskeið var birt af æfingunni.
Sextán fremstu landslið Evrópu í þessum aldursflokki taka þátt í mótinu. Þátttökuliðum er skipt niður í fjóra riðla með fjórum liðum í hverjum þeirra.
Auk íslenska landsliðsins verður Arnór Atlason, fyrrverandi landsliðsmaður í handknattleik í eldlínunni á mótinu. Hann er þjálfari danska landsliðsins sem tekur þátt í mótinu. Danir eiga sæti í C-riðli en leikir þess riðils fara fram í Koprivnica. Arnór og lærisveinar mæta Norðmönnum í fyrstu umferð í hádeginu í dag.
