Ágúst Ingi Óskarsson hefur skrifað undir tveggja ára samning við handknattleiksdeild Aftureldingar. Ágúst Ingi kemur til Aftureldingar frá Gróttu og er annar leikmaður Gróttu sem kveður liðið formlega í dag. Í morgun var greint frá vistaskiptum Jóns Ómars Gíslasonar frá Gróttu til Hauka.
Ágúst leikur sem vinstri skytta og getur spilað sem bakvörður og þristur í vörn.
Eftir eins ár veru hjá Haukum tímabilið 2022/2023 gekk Ágúst Ingi til liðs við Gróttu sumarið 2023. Hann er HK-ingur að upplagi en hefur einnig fjölskyldutengingar til Vestmannaeyja. Ágúst Ingi var einn vetur, 2021/2022, með Neistanum í Þórshöfn í Færeyjum og gerði það gott og lék m.a. til úrslita í bikarkeppninni.
Ágúst Ingi kemur inn með talsverða reynslu í Aftureldingarliðið sem verður að sjá á eftir Birgi Steini Jónssyni í atvinnumennsku til Svíþjóðar. Birgir Steinn kom til Aftureldingar sumarið 2023 frá Gróttu.
