„Maður er sár og svekktur að hafa ekki unnið leikinn af því við vorum svo nærri því. Við lékum á löngum köflum frábærlega í þessum leik. Varnarleikurinn var framúrskarandi og sóknarleikurinn var afar vel útfærður. Okkur tókst að opna pólsku vörnina nánast í hverri einustu uppstilltu sókn en því miður varð það okkur að falli að nýta ekki mörg opin marktækifæri. Það er dýrt þegar upp er staðið frá jöfnum leik við frábært pólskt landslið,“ sagði Ágúst Þór Jóhannsson, þjálfari U17 ára landsliðs kvenna, við handbolta.is í dag eftir jafntefli, 23:23, við Pólverja í lokaumferð riðlakeppni B-deildar Evrópumótsins í Litáen.
Framundan er viðureign við Spán í undanúrslitum á laugardaginn en spænska liðið er í efsta sæti A-riðils.
„Handboltinn sem var leikinn að þessu sinni var stórkostlegur. Hraðinn var mikill og okkur tókst að keyra vel á pólska liðið. Margir leikmenn stóðu sig afar vel. Við vorum aðeins hársbeidd frá að vinna mjög öflugt pólskt landslið.
Við fengum stig úr þessum leik og það var fyrir mestu þegar upp er staðið. Framundan er undirbúningur fyrir undanúrslitaleik við Spán á laugardaginn,“ sagði Ágúst Þór sem er svo sannarlega á góðri leið með þennan hóp ásamt aðstoðarfólki sínu.
Mjög stoltur af liðinu
„Ég mjög stoltur af liðinu. Það hefur staðið sig frábærlega í mótinu og það var aðeins hársbeidd frá sigri í dag. Það má segja að við erum sjálfum okkur verst varðandi færanýtinguna en ég er sannfærður um að við munum bæta okkur að því leyti í næstu leikjum,“ sagði Ágúst Þór Jóhannsson, þjálfari U17 ára landsliðsins við handbolta.is í dag.
