Markakóngur Olísdeildar karla í handknattleik, ÍR-ingurinn Baldur Fritz Bjarnason, var í vikunni við æfingar hjá þýska meistarliðinu SC Magdeburg. Fram kemur á Facebook-síðu ÍR að Baldur Fritz hafi fengið boð um að koma til æfinga hjá stórliðinu. Skiljanlega er Baldur Fritz kampakátur með boðið og dvölina.
„Þetta var fyrst og fremst ótrúlega gaman og frábært tækifæri. Það var sérstaklega skemmtilegt að reyna sig gegn þessum leikmönnum, sem ég hef fylgst með úr fjarlægð í mörg ár,“ er haft eftir Baldri Fritz á Facebook-síðu ÍR.
SC Magdeburg hefur orðið þýskur meistari tvö síðustu ár, 2023 og 2024 auk þess að vinna Meistaradeild Evrópu fyrir tveimur árum og bikarkeppnina vorið 2024.
Gísli Þorgeir Kristjánsson og Ómar Ingi Magnússon hafa leikið með Magdeburg undanfarin ár. Þeir voru hinsvegar ekki með Baldri Fritz við æfingarnar frekar en aðrir landsliðsmenn Magdeburg sem voru við æfingar og keppni með landsliðum sínum.
