Ekki urðu Aldís Ásta Heimisdóttir og samherjar í Skara HF sænskir meistarar á heimavelli í kvöld því þær töpuðu þriðju viðureigninni við IK Sävehöf, 20:18. Sävehof fagnaði þar með sínum fyrsta sigri í rimmunni og tryggði sér a.m.k. einn leik til viðbótar á heimavelli á fimmtudaginn. Skara HF hefur þegar unnið tvisvar sinnum en til þess að verða meistari þarf að hafa betur í þremur viðureignum.
Aldís Ásta skoraði tvö mörk í þremur skotum og gaf þrjár stoðsendingar fyrir Skaraliðið. Uppselt var í Skarahöllina í kvöld eins og í fyrstu viðureigninni sem félagið hýsti.
Þetta var aðeins annað tap Skara HF í 23 leikjum eftir að Daninn Rasmus Overby tók við þjálfun í desember.
IK Sävehof var með frumkvæðið í leiknum frá upphafi. Liðið skoraði fjögur af fyrstu fimm mörkunum. Eftir það jafnaðist leikurinn áfram en heimaliðið náði aldrei forskoti. Sävehof-liðið getur þakkað Elin Lindblom markverði sigurinn, öðrum fremur. Hún varði 14 skot, 47%.
