Elías Már Halldórsson hefur verið ráðinn þjálfari karlaliðs Ryger Håndball í Stafangri. Liðið lék í næst efstu deild karla á síðasta tímabili og hafnaði í níunda sæti. Markið er sett á að berjast um sæti í úrvalsdeildinni á næstu leiktíð með Elías Má við stjórnvölin, eftir því sem fram kemur í tilkynningu félagsins.
Samningur Elíasar Más og Ryger er til tveggja ára.
Síðustu fjögur ár hefur Elías Már þjálfað kvennaliðið Fredrikstad Bkl. sem leikur í úrvalsdeildinni. Undir stjórn Elíasar Más lék Fredrikstad Bkl. einnig í riðlakeppni Evrópudeildar í vetur og var ekki langt frá sæti í átta liða úrslitum.
Félagið Ryger HK er byggt á stoðum Viking Stavanger sem eitt sinn var veldi í norskum handknattleik.
Áður en Elías Már flutti til Noregs fyrir fjórum árum og tók við þjálfun Fredrikstad Bkl. þjálfaði hann m.a. karlalið HK, kvennalið Hauka og var um skeið aðstoðarþjálfari kvennalandsliðsins á tíma Axels Stefánssonar með liðið. Þar á ofan lék Elías Már um árabil með HK, Haukum, Akureyri handboltafélagi og fleiri liðum hér á landi auk þess að leika með norskum og þýskum félagsliðum.
Tilkynnt var í október á síðasta ári að Elías Már léti af störfum hjá Fredrikstad Bkl. í lok tímabilsins.
