Stórleikur Donna dugði ekki gegn meisturunum

Stórleikur Kristjáns Arnar Kristjánssonar, Donna, dugði Skanderborg AGF ekki til sigurs á meisturum Aalborg Håndbold á heimavelli í gærkvöld. Donni skoraði 11 mörk í 16 skotum og gaf fimm stoðsendingar í tveggja marka tapi Skanderborg, 29:27. Donni og félagar voru tveimur mörkum yfir í hálfleik, 17:15.

Fleiri leikmenn fóru á kostum í leiknum. Thomas Arnoldsen skoraði níu mörk í níu skotum og gaf sex stoðsendingar í liði Aalborg sem hefur forystu í riðli eitt í átta liða úrslitum með níu stig. Skjern, sem vann grannliðið Mors-Thy, 34:30, í gær, er í öðru sæti með 6 stig. Mors er með þrjú stig en Skanderborg eitt. Tvær umferðir eru eftir og eru Donni og félagar alveg úr leik í keppni um sæti í undanúrslitum.