HC Alkaloid frá Skopje í Norður Makedóníu stendur afar vel að vígi eftir fjögurra marka sigur á AEK í Aþenu í gær í fyrri úrslitaleik liðanna í Evrópubikarkeppni karla í handknattleik, 29:25. Um var að ræða fyrsta tapleik AEK á heimavelli í keppninni.
Síðari leikurinn fer fram í Skopje á sunnudagskvöldið. Metfjöldi áhorfenda var á úrslitaleik í Evrópubikarkeppninni, 7.900 áhorfendur greiddu að aðgangseyri, 400 fleiri en sáu síðari úrslitaleik Olympiakos og Vals í sömu keppnishöll í Evrópubikarkeppninni fyrir ári.
Ivan Galevski markvörður HC Alkaloid var hetja liðsins í leiknum í Aþenu. Hann varði fimm af þeim sex vítaköstum sem AEK-liðið fékk.
Dylan Garain var markahæstur hjá AEK með sex mörk Martin Serafimov skoraði einnig sex mörk fyrir HC Alkaloid. Serafimov er markahæsti leikmaður keppninnar með 68 mörk.
Þjálfari HC Alkaloid er gamla stórskyttan Kiril Lazarov sem er væntanlega þekktasti handknattleiksmaður Norður Makedóníu. Eftir að leikmannaferlinum lauk tók Lazarov við þjálfun landsliðsins og HC Alkaloid sem var smálið á þeim tíma en hefur sótt í sig veðrið svo um munar.
Karlalið Vals vann Evrópubikarkeppni karla í handknattleik á síðustu leiktíð, lagði gríska liðið Olympiakos samanlagt í tveimur leikjum og vítakeppni.
