Annar úrslitaleikur Fram og Vals um Íslandsmeistaratitilinn í handknattleik fer fram í kvöld á heimavelli Fram, Lambhagahöllinni í Úlfarsárdal. Flautað verður til leiks klukkan 19.30.
Fram vann fyrstu viðureign liðanna fimmtudagskvöld í N1-höllinni, 37:33. Valsarar voru lengi vel undir í viðureigninni en náðu góðum spretti nærri leikslokum og minnkuðu muninn í eitt mark áður en Framarar tryggðu sér öruggan sigur.
„Við þurfum annan eins leik á mánudaginn og ég veit að Framarar munu fylla Lambhagahöllina,“ sagði Einar Jónsson þjálfari Fram meðal annars í viðtali við handbolta.is eftir sigurleikinn.
„Við skoruðum mörg mörk en varnarlega vorum við slakir. Náðum varla að klukka leikmenn Fram. Þá sjaldan okkur tókst það þá fengum við á okkur tvær mínútur. Við verðum að fara vel yfir leikinn,“ sagði Róbert Aron Hostert meðal annars í viðtali við handbolta.is.
Vinna þarf þrjá leiki til þess að verða Íslandsmeistari.
Fram varð síðast Íslandsmeistari 2013 en þrjú ár eru liðin síðan Valur varð Íslandsmeistari karla í handknattleik í 24. sinn.
Viðureign Fram og Vals verður send út á Handboltapassanum. Einnig verður textalýsing á handbolti.is.
