„Hreint út sagt stórbrotin frammistaða hjá stelpunum gegn afar sterku spænsku liði,“ sagði Ágúst Þór Jóhansson, þjálfari U17 ára landsliðs kvenna, við handbolta.is fyrir stundu eftir að íslenska liðið tryggði sér sæti í úrslitum B-deildar Evrópumótsins með sigri á Spáni, 32:31, í háspennuleik þar sem úrslitin réðust á síðustu sekúndum.
Komnar í úrslit – mjög stoltur
„Sóknarleikurinn var flottur hjá okkur. Það er ekki einfalt að leika gegn 6/0 vörn spænska liðsins sem leikur með bakverði sína mjög framarlega. Stelpurnar leystu það mjög vel. Við fengum framlag frá öllum leikmönnum. Ég er einfaldlega mjög stoltur af liðinu og þeirri staðreynd að við erum komin í úrslitaleikinn á morgun,“ sagði Ágúst Þór sem var enn að jafna sig af spennu og geðshræringunni á lokakaflanum þegar hanbolti.is heyrði í honum.
Mikilvægar vörslur
„Varnarleikurinn hefur verið betri hjá okkur í öðrum leikjum mótsins. Spænska liðið er öflugt með góða leikmenn sem eru erfiðir við að eiga maður á mann. Þetta hélt hjá okkur. Það var líka dýrmætt að fá nokkrar góðar markvörslur á lokakaflanum í hnífjöfnum leik. Spennan var mikil en stelpurnar héldu einbeitingu á endasprettinum sem var frábært.
Við erum í sjöunda himni með að leika til úrslita,“ sagði Ágúst Þór.
Nýtum tímann vel
Það ræðst síðar í dag hvort íslenska liðið mætir Póllandi eða Norður Makedóníu úrslitaleiknum á morgun en leikur þeirra hefst fljótlega. Ágúst Þór sagði að næst á dagskrá hjá liðinu væri að fara inn á hótel, ná góðum málsverði og endurheimt fyrir viðureignina á morgun. Mikil orka hafi farið í leikinn í dag. Af þeim sökum væri mikilvægt að nýta næsta sólarhring fram að úrslitaleiknum eins vel og unnt væri. „Við fáum ágætan tíma til þess að hlaða rafhlöðurnar,“ sagði Ágúst Þór.
Mjög öflug liðsheild
„Auk sigursins í dag þá stendur liðsheildin fyrst og síðasta upp úr. Hún hefur verið til mikillar fyrirmyndar. Andinn er góður í hópnum. Allir leikmenn hafa lagt sitt af mörkum. Þannig verður til mjög öflug liðsheild og gott lið,“ sagði Ágúst Þór Jóhannsson, þjálfari U17 ára landsliðsins við handbolta.is þegar hann gekk út úr keppnishöllinni í Klapiéda í Litáen eftir frækinn sigur á spænska landsliðinu í B-deild Evrópumóts kvenna, skipað leikmönnum 17 ára og yngri.
