Strákarnir í U19 ára landsliðinu í handknattleik eiga fyrir höndum í dag úrslitaleik um hvort þeir komast í átta liða úrslit eða ekki á Evrópumótinu sem haldið er í Króatíu. Þeir mæta landsliði Serba í Varazdin í þriðju og síðustu umferð A-riðils. Staðan í riðlinum er jöfn, hvert liðanna fjögurra hefur tvö stig, einn vinning, eftir tvær umferðir.
Leikur Íslands og Serbíu hefst klukkan 12.30 að íslenskum tíma. Verður hægt að fylgjast með beinni útsendingu án endurgjalds á ehftv.com.
Eftir leiki á mótinu á fimmtudag og föstudag þá var frí frá leikjum á mótinu í gær. Strákarnir æfðu vel í gærmorgun og nýttu daginn til frekari undirbúnings fyrir leikinn gegn Serbum. Allir eru heilir og klárir í slaginn.
Miðröð f.v.: Þorsteinn Leó Gunnarsson, Adam Thorstensen, Einar Bragi Aðalsteinsson, Jóhannes Berg Andrason, Ísak Gústafsson.
Fremsta röð f.v. Guðmundur Bragi Ástþórsson, Brynjar Vignir Sigurjónsson, Gauti Gunnarsson, Benedikt Gunnar Óskarsson, Arnór Ísak Haddsson. Mynd/HSÍ
Ísak Gústafsson kemur inn í liðið í dag en hann tók út leikbann í viðureigninni við Ítali á föstudaginn í kjölfar þess að hafa fengið rautt spjald í leiknum við Slóvena á fimmtudaginn.
Úrslit leikja í A-riðli:
Ísland – Slóvenía 22:26.
Serbía – Ítalía 26:28.
Ísland – Ítalía 30:17.
Slóvenía – Serbía 30:36.
Staðan:
Ísland 2 – 1 – 0 – 1 – 52:43 – 2.
Serbía 2 – 1 – 0 – 1 – 62:58 – 2.
Slóvenía 2 – 1 – 0 – 1 – 56:58 – 2.
Ítalía 2 – 1 – 0 – 1 – 45:56 2.
Leikir dagsins:
12.30 Ísland – Serbía.
14.30 Slóvenía – Ítalía.
Íslenska liðið mætir liðum úr B-riðli í milliriðlum. Spánn og Svíþjóð eru örugg um að komast áfram úr B-riðli. Ungverjar og Ísraelar leika um níunda til sextánda sæti.
