„Þetta gat dottið okkar megin í dag mikið frekar en í leik eitt og tvö í einvíginu,“ sagði Óskar Bjarni Óskarsson þjálfari Vals í samtali við handbolta.is í kvöld eftir að hans lið tapaði þriðja leiknum í röð fyrir Fram, 28:27, og varð að sætt sig við að taka við silfurverðlaunum í Olísdeildinni að þessu sinni.
„Ég vil óska Fram til hamingju með Íslandsmeistaratitilinn og bikarmeistaratitilinn. Þetta er flott lið hjá þeim með flottu þjálfarateymi,“ sagði Óskar og bætti svo við.
„Það var passion í þessum leik hjá okkur flott mæting. Mestu vonbrigðin var að tapa fyrsta leiknum. Þegar á heildina litið eru það vonbrigði einnig að einvígið skuli vera búið, bæði er þetta svo gaman og það hefði verið gott fyrir handboltann að fá fleiri leiki,“ sagði Óskar Bjarni bætti við að hann hafi haft góða tilfinningu fyrir leiknum í kvöld.
Lengra viðtal við Óskar Bjarna er finna í myndskeiði hér fyrir ofan.
