Ólafur Örn Haraldsson stjórnarmaður HSÍ og formaður dómaranefndar sambandsins hefur sagt af sér. Jón Halldórsson formaður HSÍ staðfesti við handbolta.is í morgun afsögnina. Jón sagðist virða ákvörðun Ólafs Arnar en vildi að öðru leyti ekki tjá sig um málið.
Ólafur Örn var kjörinn formaður dómaranefndar og til stjórnarsetu hjá HSÍ til tveggja ára á ársþingi fyrir rúmu ári.
Vildi vísa ummælum til aganefndar
Samkvæmt upplýsingum sem handbolti.is hefur undir höndum var Ólafur Örn óánægður með hvernig tekið var á ummælum þjálfara Íslandsmeistara Fram, Einars Jónssonar, í garð dómarara í leikhléi í annarri viðureign Fram og Vals í úrslitum Íslandsmótsins.
Ólafur Örn taldi ummæli Einars skaða ímynd handboltans og vildi sem stjórnarmaður HSÍ og formaður dómaranefndar láta á það reyna og vísa ummælunum til aganefndar. Stjórnarmenn HSÍ voru á öðru máli. Við þau málalok sættir Ólafur Örn sig ekki og sagði sig úr stjórn HSÍ fyrir helgina.
Uppfært:
Ólafur Örn staðfesti afsögn sína við handbolta.is eftir að fréttin var birt. Segir Ólafur ákvörðunina tekna í mesta bróðerni. „Staðan var bara þannig að ég gat eiginlega ekki gert annað,“ sagði Ólafur Örn í skriflegu svari til handbolta.is.
