„Það er ótrúlega svekkjandi að tapa einvíginu þrjú núll. Mér finnst við vera með sterkara lið en niðurstaðan gefur til kynna,“ sagði Elín Klara Þorkelsdóttir leikmaður Hauka og landsliðskona sem lék kveðjuleik sinn fyrir Hauka í kvöld þegar liðið tapaði fyrir Val síðasta úrslitaleik liðanna um Íslandsmeistaratitilinn. Hún viðurkenndi að á þessum tímamótum á ferlinum bærðust með sér miklar tilfinningar en hún flytur til Svíþjóðar í sumar.
Elín Klara gengur til liðs við IK Sävehof, silfurlið sænsku úrvalsdeildarinnar. Hún segist sannarlega hafa kosið annan enda með Haukum.
„Valur er með ótrúlega sterkt lið. Við hefðum þurft að gera mikið betur á fleiri sviðum leiksins til þess að eiga möguleika. Valsliðið refsar fyrir öll mistök andstæðinganna auk þess sem Hafdís var öflug í öllum þremur úrslitaleikjunum,“ sagði Elín Klara ennfremur.
„Ég er spennt fyrir komandi ævintýri en að sama skapi þakklát fyrir að spila fyrir Hauka sem er geggjaður klúbbur. Ég hlakka til þess að takast á við ný ævintýri og er mjög spennt,“ sagði Elín Klara sem mætir til leiks hjá Sävehof um miðjan júlí.
Lengra viðtal við Elínu Klöru er í myndskeiði hér fyrir ofan.
Olís kvenna: Leikjadagskrá, úrslitakeppni 2025
Olísdeild kvenna – fréttasíða.
