Fer í ítarlega læknisskoðun

Gísli Þorgeir Kristjánsson fer í ítarlega læknisskoðun á morgun, mánudag, vegna meiðsla á vinstri öxl sem hann varð fyrir snemma í viðureign SC Magdeburg og Lemgo í þýsku 1. deildinni í handknattleik og handbolti.is sagði frá fyrr í dag.

Félag Gísla Þorgeirs, SC Magdeburg, segir frá væntanlegri læknisskoðun í dag. Ekki er útilokað að liðbönd í vinstri öxlinni hafi skaddast, segir í tilkynningu Magdeburg. Gísli Þorgeir kom harkalega niður á vinstri öxlina eftir að honum var hrint í gegnumbroti á þriðju mínútu viðureignarinnar.

Félagið segir að væntanlega liggi fyrir að lokinni skoðun hvers eðlis meiðslin eru.

Gísli Þorgeir á langa sögu í erfiðum meiðslum á báðum öxlum.