Danski handknattleiksmaðurinn og ein helsta vonarstjarna danska landsliðsins, Mathias Gidsel, hefur samið við þýska liðið Füchse Berlin. Hann kemur til félagsins sumarið 2022. Samningur Gidsel við Berlínarliðið er til þriggja ára.
Gidsel hefur slegið í gegn á þessu ári og hefur þar af leiðandi verið undir smásjá margra af öflugri félagsliðum Evrópu síðustu mánuði. Hann lék afar vel með danska landsliðinu á HM í Egyptalandi í janúar og kórónaði frammistöðu sína á Ólympíuleikunum í Tókýó. Að þeim loknum var Gidsel valinn besti leikmaður handknattleikskeppni leikanna auk þess að verða næst markahæstur með 46 mörk, ekkert úr vítakasti.
Gidsel var lítt þekktur fyrir ári og hafði þá ekki leikið A-landsleik. Hann er 22 ára gamall og er samherji Viktors Gísla Hallgrímssonar hjá GOG á Fjóni.
🇩🇰🧨🦊#gidsel2022 #danishdynamite #unserrevier #puma @dhf_haandbold @liquimoly_hbl @GOGsport pic.twitter.com/mAbbbqbqgV
— Füchse Berlin (@FuechseBerlin) August 17, 2021
