Orri Freyr Þorkelsson og félagar í Sporting fögnuðu sigri á Porto í úrslitaleik portúgölsku bikarkeppninnar í handknattleik síðdegis, 28:27. Aðeins er vika síðan Sporting vann Porto í síðustu umferð úrslitakeppninnar og innsiglaði sér meistaratitilinn annað árið í röð. Sporting varð einnig bikarmeistari á síðasta ári.
Orri Freyr var næst markahæstur leikmanna Sporting í úrslitaleiknum í dag með fimm mörk.
Þorsteinn Leó Gunnarsson var atkvæðamestur leikmanna Porto með átta mörk.
Porto var lengi vel með frumkvæðið í úrslitaleiknum. M.a. var tveggja marka munur á liðunum í hálfleik, 15:13, Porto í hag. Þegar á leið síðari hálfleik jafnaði Sporting metin, 22:22, þegar um tíu mínútur voru til leiksloka og náði um skeið þriggja marka forskoti, 27:24.
Þar með eru handknattleiksmenn í Portúgal komnir í sumarleyfi eftir langt og strangt keppnistímabil.
