Füchse Berlin þýskur meistari í fyrsta sinn – Viggó bjargaði Erlangen

- Auglýsing -

Füchse Berlin varð í dag þýskur meistari í handknattleik karla í fyrsta skipti. Berlínarliðið vann Rhein-Neckar Löwen í lokaumferðinni, 38:33, í Mannheim. Füchse Berlin var einu stigi fyrir ofan meistara síðasta árs, SC Magdeburg, sem vann Bietigheim, 35:25.

Viggó Kristjánsson og liðsfélagar í HC Erlangen tókst að halda sæti sínu í deildinni með því að leggja HSG Wetzlar á útivelli, 25:21. HC Erlangen hefur verið í fallhættu nánast frá fyrstu umferð. Koma Viggós til félagsins eftir áramót gjörbreytti gengi liðsins til hins betra.

Viggó hélt uppteknum hætti í dag og skoraði níu mörk fyrir Erlangen, tvö úr vítaköstum.

Lokastaðan í þýsku 1. deildinni er neðst í þessari grein.

Viktor Petersen Norberg skoraði eitt mark og gaf eina stoðsendingu auk þess að vera vikið einu sinni af leikvelli. Viktor færir sig um set í sumar og leikur með Elbflorenz í Dresden á næsta tímabili.
Bietigheim varð næst neðst og fellur í 2. deild ásamt Potsdam sem er fyrir löngu fallið. Í staðinn færast Bergischer HC og GWD Minden upp í efstu deild.
MT Melsungen varð í þriðja sæti deildarinnar. Elvar Örn Jónsson skoraði tvö mörk og gaf tvær stoðsendingar í öruggum sigri á Potsdam á útivelli, 31:26. Þetta var síðasti leikur Elvars Arnar en hann skiptir yfir til Magdeburg í sumar.
Arnar Freyr Arnarsson skoraði ekki fyrir Melsungen í dag.
Ómar Ingi Magnússon skoraði sex mörk, þar af fimm úr vítaköstum í sigurleik Magdeburg á heimavelli Bietigheim. Gísli Þorgeir Kristjánsson var ekki með vegna meiðsla.
Elliði Snær Viðarsson og Teitur Örn Einarsson skoruðu fjögur mörk hvor þegar Gummersbach vann Hannover-Burgdorf á heimavelli, 39:29. Báðum var vikið einu sinni af leikvelli. Guðjón Valur Sigurðsson er þjálfari Gummersbach.
Heiðmar Felixson er aðstoðarþjálfari Hannover-Burgdorf.
Ýmir Örn Gíslason skoraði eitt mark og var einu sinni vísað af leikvelli þegar Göppingen sótti stig til Lemgo, 29:29.
Stuttgart bjargaði sér frá falli með því að leggja SC DHfK Leipzig, 29:28, á heimavelli. Andri Már Rúnarsson var markahæstur hjá Leipzig með sjö mörk ásamt Franz Semper. Rúnar Sigtryggsson er þjálfari SC DHfK Leipzig.
Tim Freihöfer skoraði 11 mörk fyrir Füchse Berlin og Mathias Gidsel 10 mörk í sigurleiknum í Mannheim þegar liðið tryggði sér þýska meistaratitilinn í fyrsta skipti.